1Cor 13 | KMG | STEP | No ŋicmaracko me aŋelo maracko miti muzapo, ehuc maŋjauŋ tâmiric juzapo, ine qeŋ goŋgoŋ iŋucne erâ dâŋ fânâŋ sawa ezapo.

1 Corinthians 13

Maŋjauŋ tâmiricko wiac epene racne eocmu

1 No ŋicmaracko me aŋelo maracko miti muzapo, ehuc maŋjauŋ tâmiric juzapo, ine qeŋ goŋgoŋ iŋucne erâ dâŋ fânâŋ sawa ezapo. 2 Me no porofete juhuc dâŋ soŋne mana-fârezapo â mitire šuhucne mana utucke-fârezapo â tiki mupe rârieocte irec sâc mamanasiŋ fonarezac, ehuc maŋjauŋ tâmiric juzapo, ine ŋic jawane ezapo. 3 Me wiac-nane sasawa hapetac bâmec bajarezapo â sahac-nane qikiŋnepe šocte nânâ ezac, ehuc maŋjauŋ tâmiricko ezapo, ine racne efârezac.

Maŋjauŋheczi miti hatao sâcne âteocmu

4 Maŋjauŋheczi wama ruaine juocmu, maŋjauŋheczi iiŋguuŋ mi eocmu, maŋjauŋheczi penaroŋ mi eocmu, e jahacnere maname fefene mi eocmu 5 e šaubac tâmiric, iiriac tâmiric, aaric tâmiric, kiŋ babaju tâmiric juocmu” 6 sâqocnezi haŋ bame busâqoc manaocmu, â mitizi haŋ bame bubiaŋ manaocmu” 7 maŋjauŋhec e dede ââsic-ticne ɋârâŋne, mamanasiŋ-ticne ɋârâŋne, maŋzi woworic-ticne ɋârâŋne, maŋuruc-ticne ɋârâŋne.

Maŋjauŋzi tatarane tâmiric

8 Maŋjauŋ i tatarane tâmiric. Findaŋdâŋ mumu i tataranehec, erâ dâŋ marac furuo mumu i wâc tataranehec, â fuŋne mamana i wâc tataranehec. 9 I šiŋucte: Fuŋne mamana-nâŋec i faisuc â findaŋdâŋ mumu-nâŋec i faisuc jaha wâc. 10 Juku ine wiac fofo dunduŋne fuame wiac faisuc eenezi omaezokac. 11 No ɋiene juhuc ɋiedâŋ mujupac â ɋiemaŋhec jujupac â ɋie mamana mana jupac. Izi juku ŋic erâ ɋie wiac hetarapo. 12 Dameŋ šiŋuczia wiac honeeŋgopeneŋ i turuŋzi hawari bâtikie-nâreme sisifucne honeeŋgopeneŋ irec sâc, juku ine fârine šâŋeo hehec erâ hone mana tarac ezokopac, i Wofuŋzi no hone mana tarac enarewec irec sâc. 13 Eme fofo sanaŋ foniŋmu ine mamanasiŋ, woworic â maŋjauŋ, jaŋe jahec â moczi. Maŋjauŋzi ine micne ekac.